Roedd Angela Cutler o Albion Eco yn bresennol yng ngweithdy blynyddol y grŵp Bygythiadau Newydd i Ddŵr ddydd Mawrth 5 Tachwedd yng Nghaerdydd.
Mae aelodau’r grŵp yn cynnwys arbenigwyr o Lywodraeth Cymru, Cyfoeth Naturiol Cymru, yr Arolygiaeth Dŵr Yfed, cwmnïau dŵr, prifysgolion a’r diwydiant dŵr ehangach, ac rydym yn ystyried y bygythiadau cemegol newydd i’r amgylchedd ac ansawdd dŵr yfed yng Nghymru. Y nod yw helpu Llywodraeth Cymru wrth iddi ddatblygu polisi hirdymor.
Y cyfarfod ddydd Mawrth oedd yr ail gyfarfod blynyddol a gynhaliwyd yn y cnawd, a thrafodwyd y cysylltiad rhwng y bygythiadau newydd i ddŵr ac iechyd. Yn dilyn cyflwyniad diddorol gan Dr Keith Reid, Y Dirprwy Prif Swyddog Meddygol (Iechyd y Cyhoedd), cynhaliwyd gweithdy’n canolbwyntio ar y cysylltiad rhwng bygythiadau newydd i ddŵr a bioamrywiaeth, dan arweiniad Katherine Mullin, Llywodraeth Cymru.
Mae cael cyfle i drafod y materion hyn gyda chydweithwyr o gefndiroedd gwahanol yn tanlinellu pa mor gydgysylltiedig yw iechyd pobl a chyflwr yr amgylchedd naturiol, a chymaint o waith sydd gennym i’w wneud, ond roedd hefyd yn gyfle i ddathlu llwyddiant, fel ansawdd dŵr yfed yng Nghymru.
